Welkom by Letter Liefde

Meer oor Letter Liefde

Selfvertroue begin met begrip.

Welkom by Letter Liefde. Daar is 'n algemene fout wat gemaak word: om te dink leerders moet woorde as prentjies memoriseer of raai wat op die bladsy staan. Ons glo nie daarin nie. By Letter Liefde val die klem op die wetenskap van lees, asook die tegniek agter goeie skryfwerk en oortuigende openbare optredes. Ons bied 'n logiese, bewysgebaseerde benadering tot geletterdheid in beide Afrikaans en Engels. Ons is nie 'n naskoolsentrum wat met algemene huiswerk help nie; ons bou die fundamentele vaardighede wat nodig is vir onafhanklike, vloeiende lees en skryf.

Taal wat sin maak

Ons rus leerders toe met vaardighede wat 'n leeftyd hou.

Stap vir stap vooruit

Van onsekerheid na onafhanklike vaardigheid

Dit kan frustrerend wees wanneer lees of skryf soos 'n stryd voel. By Letter Liefde verstaan ons hierdie uitdagings, en ons weet ook dat dit suksesvol oorkom kan word met die regte, gestruktureerde ondersteuning.

Ons verruil raaiwerk vir bewese tegnieke. Met deernis en ‘n professionele aanslag help ons leerders om die logika agter elke woord te verstaan – sodat hulle die vaardighede bou om uiteindelik met selfvertroue te lees, praat en skryf.

Doelgerigte ondersteuning vir lees, skryf en praat

Individuele Leesterapie

Gespesialiseerde, een-tot-een intervensie om spesifieke leeshindernisse te oorkom.

Kleingroep Sessies

Gestruktureerde, bewysgebaseerde groepklasse vir leerders met soortgelyke leesdoelwitte.

Redenaars & Eisteddfod

Doelgerigte afrigting om met selfvertroue, tegniese akkuraatheid en oortuiging te praat.

Eksamenskonsessies (Amanuensis)

Opgeleide voorleser en skryfhulp om leerders met goedgekeurde leerhindernisse tydens toetse en eksamens te ondersteun.

Skryf van Toesprake

Oorspronklike, pasgemaakte toesprake en praatjies wat spesifiek vir die spreker en die vereistes van die kompetisie geskryf word.

Mentorskap vir Skrywers

Persoonlike, een-tot-een leiding vir jou spesifieke skryfprojekte of poësieportefeuljes.

Omvattende Leesassesserings

Gestruktureerde evaluering van klankbegrip, dekodering
en leesvlotheid om spesifieke vaardigheidsgapings te identifiseer vir doelgerigte intervensie.

Letter Liefde Skryfskool

Gestruktureerde leiding in poësie, kortverhale en kinderboeke, van jou heel eerste konsep tot 'n professioneel afgeronde manuskrip.

Die hart agter Letter Liefde: Christel Brooks

Christel Brooks

Leesterapeut | Skrywer & Stigter

Hallo, ek is Christel Brooks – die stigter van Letter Liefde en ‘n Geakkrediteerde Leesterapeut. Ek het ‘n passie vir geletterdheid, maar my benadering in die praktyk is stewig gegrond in die wetenskap van hoe die brein leer lees. Deur bewysgebaseerde metodes te gebruik, help ek leerders om die klank-tot-simbool kode van taal stelselmatig te ontsyfer. Omdat ek glo ‘n mens moet altyd aanhou groei, is ek tans besig met verdere spesialisasie in Gestruktureerde Geletterdheid.

Omdat leeruitdagings dikwels komplekse oplossings verg, glo ek in ‘n spanbenadering. Alhoewel ek nie ‘n spraakterapeut is nie, werk ek hand-aan-hand met spraakterapeute, oudioloë en opvoedkundige sielkundiges om seker te maak elke leerder kry die spesifieke ondersteuning wat hulle benodig.

Benewens my werk met leesonderrig, strek my pad met taal ook uit na die kreatiewe en praktiese toepassing daarvan. As ‘n gepubliseerde digter (my debuutbundel het in 2023 verskyn) en beoordelaar en mentor vir ATKV-Redenaars, is dit vir my ‘n voorreg om talent te help slyp. Deur ons Skryfskool en redenaarsafrigting begelei ek leerders en skrywers om nie net te weet wát om te sê nie, maar veral hoe om dit met tegniese akkuraatheid en ware selfvertroue oor te dra.